This document is part of the

Sinaguto ito
ng ika 30 ng Abril 1897

M.Julio N. Nakpil, Giliw,
M. na P. ng Sangunian sa dakong Hilagaan

Minamahal na Kapatid: buhat sa sunodsunod na pagka-agaw ng Kastila sa mga bayan ng Silang, Dasmarinas, Imus, Bakood, Kawit, Noveleta, Salinas, Malabon at Tanza ay siyang kadahilanan ng di ko pag sulat dian sa inyo.

Tungkol sa mailigpit ninyong salapi ay inyong tipunin dian at di nararapat na inyong ipagkaloob sa kangino pa man, sapagka’t tayo ang nagpadala ng Poder sa Hong Kong ay tayo ang siyang mapapahiya kung walang maibigay tayong salapi, sapagka’t ang salaping nailigpit dito ay halos ubos na sa kagugugol ng mga Pinuno dito sa kanilang pagkakailangan at Panghihimagsik.

Ang mga kapsulang vacio at mga tanso na inyong natitipon dian ay inyong itagong mabuti at kasama ka na darating dian ang mga mangagawa ng kapsula at kanon.

Tungkol sa taung inyong ipinahatid dito na nagngangalan Benito de Guzman ay hindi ko nalaman ang kanyang pagkawala at kun sa akala ninyo na iyan ay masama ay inyong dakpin.

Ako at sampu ng mga kawal na nararito sa Tangway (=Cavite) na may dalawangpung Remington at Mauser at mga dalawangpung de piston gayon din ang may mga isang libong sandatahan ay handa sa pag uwi [?] dian na na sa sa labas na ng bayan ng Indang at tanging inaantabayanan ang inutusan ko dian si M. Antonino Guevarra na makikipagyari sa inio rian tungkol sa binabalak namin pagsalakay sa dakong Silangan (Laguna); kaya’t marapatin ninyong pabalikin agad dito upang magawa sa madaling panahon ang nararapat.

Tungkol sa pagtitipon ng salapi ito’y kung mapasok tayo ng bayan ay madali na ang pag hingi o pag samsam sa manga mayayaman.

Kinakailangan kayo’y sumirkular sa mga bayan ng Bulakan at Nueva Ecija na ipakilala ninyo [?] ang kapangyarihan tungkol sa pamaguitan ng Nombramiento na aking ipinadala sa inyo tuloy gisingin ang kanilang kalooban sa pag galaw at huag ikasira ng loob ang pagkapasok ng Kastila nitong mga bayan ng Tangway, sapagka’t ang Revolucion sa nangyaring ito ay lalong lumaganap at lumaki sapagka’t tumawid sa mga bayan ng Batangan at Silangan at marahil tumawid pa ng Tayabas, Mindoro at Camarines, bukod dito’y dapat ikatira ang pagkakaayon sa Kastila ng ilang mga kababayan, sapagka’t sila ang doo’y gagawa ng paraan papagtananin ang mga sundalong tagalog, ..gaya ng nangyayari ngayon sunodsunod na pag tatanan.

Kalakip nito na inyong tatangapin ang isang sulat na kasagutan na ipinadala dito ni M. Lucrecio Bachiller, Mataginting sa ipinadala dito na mangyaring inyong ipahatid sa madaling panahon upang magawa nito ang kinakailangan pag aayos sa kanyang mga kawal.

Gayondin naman ipinahatid ko dian sa inyo sa pamamagitan ni M. Antonino Guevarra ang mga nombramiento ninyo ng inyong Kalihim at ng kay Gral. Emilio (=Emilio Aguinaldo).

Tangapin ninyo ang mahigpit na yakap.

Limbon (Indan), 24 Abril 1897

Ang Plo. ng H. B.
Andres Bonifacio
Maypagasa

H.L.

Ang hukbo ng kapatid na si M. Lucrecio Taginting na dapat mapailalim sa inyong pangangasiwa ay kinakailangang inyong pagsadiain at pagsiyasatin ang mga kinakailangan nila.

Gayon din kung kayo’y may labis na polvora ay sila’y [?] inyong bigyan upang sa paraang ito ay huag na lumayo sa atin.

Kalakip na inyong tatangapin ang mga limbag na tula ni M. Rizal at ang Cartilla ay saka na magpapalimbag kami.

Vale

-----

^*FN This document was transcribed by Jim Richardson in Katipunan: Documents and studies website (http://kasaysayan-kkk.info/).